Lənkəran rayonunun Sütəmurdov kənd sakini Şıxəli Kazımov 78 illik ömrünün 50 ildən çoxunu tingçiliklə məşğuldur. Bu haqda məlumatı Cenublu.az bu gün, 20 fevral tarixində Azertac-a istinadən verir.
O, təsərrüfatçı, işgüzar əmək adamı, torpağa bağlı insan kimi tanınır. Qış fəsli olmasına baxmayaraq, Şıxəli dayı yorulmadan çalışır, sitrus tinglərini polietilen qablara əkir, calaq olunmuş bitkiləri mütəmadi yoxlayır, calaqaltıdan əmələ gəlmiş zoğları təmizləyir. O, şəxsi təsərrüfat sahəsində müxtəlif növ meyvə ağacları, eləcə də dekorativ bitkilər yetişdirir:
“Qayınatamgil bu işlə məşğul olublar. Mən ondan öyrənmişəm. O vaxtdan, 1969-cu ildən ağac calaq edirəm. Qocalsam da, yenə bu işlə məşğulam”, – deyən bağbanın sözlərinə görə, indi armud calağı etməyin vaxtıdır. Sitrus meyvələrini isə avqust ayında calaq etmək məsləhətdir.
Təsərrüfatçı deyir ki, hər bir meyvə ağacının ömrü, onun məhsuldarlığı birinci növbədə calaqaltıdan asılıdır.
Bir neçə calaq üsulu var. Ən çox tətbiq edilən qələm, yarma, göz calaqlarıdır ki, onların da hər biri mövsümə uyğun olunmalıdır. Şıxəli bağban, əsasən, göz və yarma calaq üsullarına üstünlük verir.
Calaqçı bağında yerli “dədə-baba” sortları ilə yanaşı, yeni subtropik bitkilər də yetişdirir. Toxumunu uzun illər əvvəl xaricdən gətirdiyi quava bitkisi kimi.
Şıxəli dayı bu gün hansı meyvələrə tələbat varsa, onları calaq etməyə üstünlük verir. Calaq edib satdığı meyvə tinglərinin həm rayonun özündən, həm də respublikanın digər bölgələrindən müştəriləri var.
