Lənkəran şəhər 4 saylı məktəbin şagirdinin şəhər icra başçısının müavini və oxuduğu məktəbin direktoru tərəfindən döyüldüyü iddia olunub. Bununla bağlı Azərbaycan Uşaqlar Birliyinin sədri Kəmalə Ağazadə bu gün, 15 iyul tarixində paylaşım edib.
Belə ki, başçının müavini Rəsilə Əliyeva və 4 saylı məktəbin direktoru Yeganə Əsgərova (Babayeva) məktəblini attestat vermək adı ilə evə çağırıblar və ona qarşı fiziki zorakılıq tətbiq ediblər. Səbəb kimi isə məktəblinin Rəsilə Əliyevanın qızının telefonundan istədiyi oğlana mesaj yazması olub. Mənbə, həmçinin qeyd edib ki, Rəsilə Əliyeva öz qızına da zor tətbiq edib.
Məsələ ilə bağlı Lent.az-a DİN-in Mətbuat Xidmətinin Lənkəran regional qrupunun baş inspektoru, polis baş leytenantı Məhəmməd Rzayev bildirib ki, həmin hadisə ilə bağlı Lənkəran ŞRPŞ-yə daxil olmuş müraciət əsasında araşdırma aparılır. Müvafiq ekspertiza təyin edilib. Ekspertizanın və araşdırmanın nəticəsindən asılı olaraq, məsələyə hüquqi qiymət veriləcək.
Lənkəran-Astara Regional Təhsil İdarəsindən də hazırda məsələ ilə bağlı araşdırılma aparıldığı bildirilib.
Qeyd edək ki, Rəsilə Əliyeva Lənkəran ŞİH-nin başçısı Taleh Qaraşovun müavini və ictimai-siyasi və humanitar məsələlər şöbəsinin müdiridir.
