Masallı şəhərində məktəbli qızların təhsilə və peşələrə maraqlarının artırılması məqsədilə tanışlıq turu təşkil edilib. Bu haqda məlumatı Cenublu.az bu gün, 21 oktyabr tarixində verir.
“Kəndlərdə yaşayan qızların təhsilə və peşə seçiminə təşviqi” layihəsi çərçivəsində təşkil edilən infotura 20 nəfər məktəbli qız cəlb edilib. Onlar Qızılağac, Köhnə Alvadı, Qəriblər, Yeyənkənd və Şərəfə kəndlərindən dəvət olunublar.
İştirakçılar H.Əliyev Mərkəzində yerləşən Masallı Qadın Resurs Mərkəzini, Gənclərin İnkişaf və Karyera Mərkəzinin Lənkəran-Astara Regional nümayəndəliyinin Masallı bölməsini, H.Əliyev Mərkəzində rəssamlıq sahəsi üzrə fəaliyyət göstərən mərkəzi, Masallı Sənayə Məhəlləsini, Masallı Təhsil Fondunu və Masallı ASAN həyat kompleksində yerləşən İnsan Hüquqları üzrə Müvəkkilinin (Ombudsman) Cənub Regional Mərkəzini ziyarət ediblər.
İnfoturun keçirilməsində məqsəd kəndlərdə yaşayan qızların təhsilə və peşələrə marağının artırılması və onlara rayonun sosial-iqtisadi potensialını tanıtmaqdır.
Tədbir Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilib.
Qeyd edək ki, proyektin birinci mərhələsində adıçəkilən 5 kəndin hər birində ümumilikdə 128 nəfər qızın iştirakı ilə maarifləndirici sessiyalar keçirilib. Onların arasında seçilən fəal 20 nəfər infotura qoşulub.
