Astaranın kəndlərindən birində qohumlar arasında yaranan mübahisə cinayət işi ilə nəticələnib.
1983-cü il təvəllüdlü Altay qohumu və həmkəndlisi Fərmanla kafedə mübahisə edib. Mübahisə zamanı Altay Fərmana yumruq zərbələri endirərək ona xəsarətlər yetirib. Hadisədən sonra onun barəsində Cinayət Məcəlləsinin qəsdən sağlamlığa zərər vurma maddəsi ilə ittiham irəli sürülüb.
Məhkəmədə Altay özünü təqsirli bilib. O bildirib ki, hadisə günü Fərman onu səhər yeməyinə dəvət edib. Kafeyə çatanda xaşın qurtardığını öyrəniblər. Fərman başqa yemək sifariş etsə də, Altay onunla spirtli içki qəbul etdiyinə görə eyni masada oturmayıb və kənarda çay içib.
Altayın sözlərinə görə, bir müddət sonra Fərman sərxoş vəziyyətdə kənd sakinlərindən birinin qohumunu təhqir etməyə başlayıb. O, dəfələrlə Fərmana bunu dayandırmağı desə də, qarşı tərəf həm təhqirləri davam etdirib, həm də onunla mübahisəyə başlayıb. Mübahisə əlbəyaxa davaya çevrilib və Altay Fərmanın alın nahiyəsinə yumruq vuraraq kafeni tərk edib.
Astara Rayon Məhkəməsinin hökmü ilə Altay 1000 manat cərimə cəzasına məhkum edilib.
Adlar şərtidir.
Mənbə: demokrat.аz
