Cəlilabad rayonunun Qamışlıgöl kəndində, Buravar sıra dağlarının ətəyində salınmış Zəli gölündə bu gün unikal şərq zəlisi yaşayır. Bu haqda məlumatı Cenublu.az bu gün, 24 iyun tarixində Bizim.media-ya istinadən verir.
Zəli gölü Azərbaycan ərazisinə yürüş edən Əmir Teymurun əsgərlərinin yoluxucu xəstəliklərdən müalicəsi üçün yaratdığı düşərgədə qurulan süni göldür. Bu əraziyə "Mərəzxana" da deyilir.
Hazırda təqaüddə olan kənd sakini və müəllim Elnur Tağıyev deyir ki, uşaqlıqdan bu ərazidə yaşayan sakinlərin müalicəsinin əsasında zəlinin dayandığını görüb. Oynaq ağrılarından tutmuş ürək ağrılarına qədər zəli əvəzedilməz məlhəm rolu oynayıb. Hətta gicgaha qoyulan zəli göz zəifliyini tam aradan qaldıra bilib.
Qeyd edək ki, zəli ilə müalicə hirudoterapiya adlanır. Mütəxəssislərin fikrincə, zəli insan qanına öz ağız suyunu buraxdıqdan sonra onun tərkibindəki 60-dan çox zülal komponentləri müalicəvi təsiri sürətləndirir. Buna görə də zəli ürək-damar, ginekoloji, prostat, qalxanvari vəz, babasil və digər xəstəliklərdə çox kömək edir. Eyni zamanda qan təzyiqi stabilləşir, laxtalanmanın qarşısı alınır, yuxu və iştaha yaxşılaşır.
Hazırda zəli tutmaqla sözügedən kəndin bir neçə gənci könüllü olaraq məşğul olur. Yəni kimsə xəstədirsə, bu gənclər təmənnasız olaraq gölə daxil olurlar. Onların həm özlərinə məxsus zəli tutmaq texnikası var, həm də zəlini xüsusi nəğmə oxuyaraq çağırırlar.
"Zalxa, Zalxa, gəl bir qaşıq qan apar!" çağrışı ilə başlayan nəğmə zəli tutulana qədər davam edir. Bu nəğmənin də el içində uzun illərdir yaşadıldığı bildirilir.
Həmin gənclərdən olan Hüseyn Mirzəyev deyir ki, indi zəli tutmaq da çətinləşib. Çünki gölə su yığılmasının qarşısı zaman-zaman alınır. Avqustda isə göl quruduğundan zəlilər də tələf olub gedir. Əslində isə məhz isti aylarda zəli üzə çıxır və bu aylarda zəlidən istifadə daha çox məsləhət görülür.
Kənd sakinlərinin ən böyük arzuları göl ətrafında tibbi-istirahət müəssisənin yaradılmasıdır. Bu həm minillik şəfa mənbəyinin dirçəldilməsi, həm də tariximizin yaşadılması olardı.
