Cəlilabad rayonunun Uzuntəpə kəndində yağıntılar səbəbindən baş verən sürüşmə nəticəsində arxeoloji baxımdan əhəmiyyətli tapıntılar aşkarlanıb. Belə ki, su kanalının içərisində müxtəlif məişət əşyalarının qalıqları və insan sümükləri üzə çıxıb.
Əraziyə baxış keçirən tarixçilər bu tapıntıların Muğan mədəniyyətinə aid olduğunu bildirirlər. Onların sözlərinə görə, qalıqların müxtəlif dövrlərə aid olması burada bir neçə mədəni təbəqənin mövcudluğuna işarə edir. Bu isə ərazidə uzun müddət oturaq həyatın hökm sürdüyünü göstərir.
Tapıntılar arasında qədim metaləritmə proseslərindən qalan tullantılar da aşkar edilib. Mütəxəssislər bu faktın bölgədə vaxtilə metaləritmə sənətinin inkişaf etdiyini və burada yaşayan insanların köçəri deyil, oturaq həyat tərzi keçirdiyini sübut etdiyini vurğulayırlar.
Hazırda tapıntılarla bağlı ilkin məlumatlar Azərbaycan Milli Elmlər Akademiyasının Arxeologiya və Antropologiya İnstitutuna təqdim olunub. Yaxın günlərdə ərazidə daha ətraflı arxeoloji tədqiqatların aparılması üçün mütəxəssislərin bölgəyə ezam olunacağı gözlənilir.
View this post on Instagram
