Lənkəranda yaşayıb yaradan, 80 illik ömrünün böyük bir hissəsini heykəltəraşlıq və rəssamlığa həsr edən Məmmədyar Cəfərov nəinki Lənkəranda, hətta ölkə miqyasında tanınır və sevilir. O, əsərlərində milli dəyərləri, insanın daxili dünyasını və həyatın mürəkkəbliyini ustalıqla əks etdirir.
Cenublu.az-la həmsöhbət olan sənətkar deyir ki, bu sənətə başlayanda çətinliklərin olduğunu bilmirdi. O qeyd edib ki, əsər yaratmaq üçün səbirli olmaq gərəkdir, çünki bu sənət təkcə əllərin yox, həm də ruhun işidir:
“İnsan əlləri ilə daşları yonub, şəkil verə bilər, amma ruhunu işə qatmasa, gördüyü iş cansız olar. Heykəl canlı kimi hiss edilməlidir. Ən əsası heykəltaraş olmaq üçün mütləq anatomiyanı da bilməlisən.”
80 yaşı olmasına baxmayaraq, Məmmədyar Cəfərov hələ də hər gün emalatxanasında işləyir. O, fırçasını və oyma alətlərini heç vaxt kənara qoymur. Yaratdığı əsərlərdən bəziləri evini bəzəyir, bəziləri isə Lənkəran və ətraf bölgələrdəki sərgilərdə və müxtəlif istirahət zonalarında nümayiş olunur.
Qeyd edək ki, sənətkar uzun müddət Türkiyədə, Moldovada çalışıb və oradakı insanların rəğbətini də qazana bilib.
