Redaksiyamıza Lənkəran rayonunun Rvo kəndindən şikayət daxil olub.
Cenublu.az-a müraciət edən sakinlər bildirirlər ki, bir neçə ailənin yaşadığı evlərə rahat gedib-gəlməsi üçün kənddən axan arxın üzərindən körpü salınmalıdır. Onlar bunu öz hesablarına etmək istəsələr də, bələdiyyə icazə vermir.
Şikayətçi iddia edir ki, İcra Hakimiyyəti və digər qurumlara dəfələrlə müraciət edib, lakin üç aydır ona sadəcə “xəbər edərik” cavabı verilir. Kəndi ikiyə bölən arx üzərindən yeganə keçid vasitəsi taxta körpüdür, lakin o da yararsız haldadır.
Bildirilir ki, kənddə yaşayan əhali feyxoa bağlarına getmək və məhsulu daşımaq üçün çətinlik çəkir. Tikilməsi tələb edilən körpü isə həm sakinlərin rahat hərəkətinə, həm də kəndin təsərrüfatına müsbət təsir göstərəcək.
Sakin iddia edir ki, yeni təyin olunmuş bələdiyyə sədri Samirə xanım körpünün çəkilməsi üçün əvvəlcə 8-9 min manat, indi isə 15.000 manat tələb edir. Halbuki vətəndaş dövlət rüsumlarını ödəməyə hazır olduğunu, amma bu məbləğin birbaşa dövlət büdcəsinə köçürülməsini istədiyini bildirir.
Məsələ ilə bağlı Şəhər İcra Hakimiyyəti ilə əlaqə saxlamağa cəhd göstərilsə də, bütün zənglər cavabsız qalıb.
View this post on Instagram
