Bu gün Aprel döyüşləri zamanı şəhadətə ucalmış Azərbaycanın Milli Qəhrəmanı Pəncəli Teymurovun dünyaya göz açdığı gündür.
Pəncəli Nurməhəmməd oğlu Teymurov 1981-ci il martın 24-də Astara rayonunun Əzərüd kəndində anadan olub.
1999-cu ildə hərbi xidmətə yollanan Pəncəli Teymurov kəşfiyyatçı peşəsinə yiyələnib və hərbi hissənin ən mahir kəşfiyyatçısı olub. Hərbi xidməti başa vurduqdan sonra Xüsusi Təyinatlı Qüvvələrin kəşfiyyatçı-diversant taboruna keçib və 17 il Azərbaycan ordusunda şərəflə xidmət edib.
Xüsusi təlimlərdə iştirak etmiş Pəncəli "Qoca Qurd" ləqəbini qazanıb.
2016-cı il 2 aprel tarixində başlamış Aprel döyüşlərində iştirak edib. Çoxlu sayda düşməni məhv edən Pəncəli 2016-cı il aprelin 3-də qəhrəmancasına şəhid olub.
Təltifnamə və fəxri fərmanlarının sayının ucu-bucağı olmayan igid Pəncəli Teymurovun mükafatları:
- Azərbaycan Silahlı Qüvvələrinin 10 illiyi yubiley medallı 25 iyun 2007-ci il;
- Azərbaycan Respublikasının Silahlı Qüvvələrinin 90 illiyi medallı – 26 iyun 2008- ci il;
- Azərbaycan Respublikasının Silahlı Qüvvələrinin 95 illiyi medallı 26 iyun 2013-cü il;
- Qüsursuz Xidmətə görə 3-cü dərəcəli medallı 26 iyun 2010-cu il;
- Qüsursuz Xidmətə görə 2-ci dərəcəli medallı 2 iyul 2014-cü il;
- Türkiyə Cümhuriyyətinin Xüsusi Təyinatlı Qüvvələrinin "Qızıl Bayraq" medallı 20 yanvar 2014-cü il;
- Hərbi Xidmətdə Fərqlənməyə görə 3-cü dərəcəli medallı 17 fevral 2015-ci il;
- "İgidliyə görə" medalı.
Əlavə olaraq, Pəncəli Teymurov 8 Fəxri Fərman, Türkiyə Cümhuriyyətinin Xüsusi Təyinatlı Qüvvələri tərəfindən bir sıra mükafatlar və tərifnamələr ilə təltif edilib. Aprel döyüşlərindəki misilsiz şücaətinə görə ölümündən sonra "Vətən uğrunda" medalına layiq görülüb.
Azərbaycan Respublikasının Prezidenti İlham Əliyevin 7 noyabr 2025-cil il tarixli Sərəncamı ilə "Azərbaycanın Milli Qəhrəmanı" adına layiq görülüb.
