Lerik-Hamarat-Vijaker yolunda qar uçqunu baş verib və 20-ə yaxın kəndə gediş-gəliş çətinləşib.
Cenublu.az-ın verdiyi xəbərə görə, bir neçə gündür yağan güclü qar yollarda problemlər yaradıb. Lənkəran-Lerik magistralı açılsa da, ucqar dağ kəndlərinə gedən yollarda problem qalmaqdadır. Əsasən rayonun Lerik-Hamarat-Vijaker yolunda qar uçqunları baş verib. Həmin istiqamətdə 20-ə yaxın kəndə gediş-gəliş çətinləşib. Bu yolda Lerik DYP əməkdaşları təhlükəsizlik tədbirləri görür.
Lerik fövqəladə hallar komissiyasının sədri Habil Məlikov Cenublu.az-a bildirib ki, 52 saylı Lerik Yol İstismar İdarəsi yolları qardan təmizləyir:
“Dünənə kimi 50-ə yaxın kənddə elektrik enerjisi verilişi dayanmışdı. Bu gün artıq işin 50 faizi görülüb və günün sonuna kimi rayon elektrik enerjisi ilə tam təmin olunacaq".
Qeyd edək ki, hazırda bölgədə günəşli hava müşahidə olunur. Gecəyə doğru havanın temperaturunun 5-7° şaxta olacağı proqnozlaşdırılır.
