Lənkəranda təcili tibbi yardım avtomobili qəzaya düşüb.
Cenublu.az xəbər verir ki, Astaradan Lənkərana xəstə gətirən avtomobilin qəzaya düşməsi nəticəsində xəsarət alanlar olub.
Hadisə gecə saatlarında köhnə Ələt-Astara magistralında, Lənkəran rayonunun Digah kəndi ərazisində baş verib. Təcili yardım avtomobili Astaradan Lənkərana xəstə, Astara rayon sakini 1956-cı il təvəllüdlü Ağabacı Əsəd qızı Əhmədovanı gətirərkən qarşısına Lənkəran rayon Şağlaküçə kənd sakini 1990-cı il təvəllüdlü Natiq Balakişi oğlu Şərifzadənin idarə etdiyi "Hundai Tucson" markalı minik avtomobili çıxıb. Bu zaman qəza qaçılmaz olub. Qəzada avtomobildə olan xəstə və xəstənin yaxınları - 1977-ci il təvəllüdlü Elnarə Elsevər qızı Əhmədova və 1988-ci il təvəllüdlü Samir Rakif oğlu İbrahimov müxtəlif dərəcəli bədən xəsarətləri alaraq Lənkəran rayon mərkəzi xəstəxanasına hospitalizasiya olunublar. Xəstə Ağabacı Əhmədova təcili olaraq reanimasiya şöbəsinə yerləşdirilib.
Qeyd edək ki, "Hundai Tucson"un sürücüsü N.Şərifzadə də Lənkəran rayon Təcili və Təxirəsalınmaz Tibbi Yardım şöbəsinin əməkdaşıdır.
Faktla bağlı araşdırma aparılır.
