Lənkəran sakinlərini təşvişə salan qadın psixoloji dispanserə yerləşdirilib.
Cenublu.az xəbər verir ki, bir müddət öncə redaksiyamıza şəhər ərazisində qadının uşaq oğurluğu ilə məşğul olması barədə çoxsaylı şikayət daxil olub.
Sözügedən məsələnin araşdırılması üçün aidiyyəti üzrə müraciət etdikdən dərhal sonra DİN-in Mətbuat Xidmətinin Gəncə regional qrupunun baş inspektoru Eşqin Qasımov açıqlamasında bildirib ki, sosial şəbəkələrdə Gəncə şəhərində uşaq oğurluğu ilə bağlı yayılan iddialar həqiqəti əks etdirmir.
“Bununla bağlı polisə hər hansı bir məlumat daxil olmayıb. Yayılan həmin məlumatlar həqiqəti əks etdirmir. İddialar polis əməkdaşları tərəfindən hərtərəfli araşdırılıb və 1971-ci il təvəllüdlü həmin qadın polis orqanına dəvət edilib.
Psixi sağlamlıq vəziyyəti nəzərə alınaraq ailə üzvlərinin ərizəsi və özünün razılığı əsasında müvafiq qaydada müalicə almasından ötrü Lənkəran Rayonlararası Psixoterapiya dispanserinə yerləşdirilməsi təmin edilib”, - deyə açıqlamada qeyd olunub.
Əldə etdiyimiz məlumata əsasən, qadının adı Nənəşdir və o, Lənkəran şəhər sakinidir. Psixoloji vəziyyəti qənaətbəxş olmayan şəxs eyni zamanda Gəncədə də olub və şəhər sakinləri də onun fotolarını sosial şəbəkələrdə paylaşaraq narahatlıqlarını bildiriblər.
Bundan əlavə, həmin qadını tanıyan Lənkəran sakinləri də sosial şəbəkələrdə yayılmış iddiaları təkzib ediblər: “Nənəş xalanın zənbilində itlər üçün yemək olur, həmişə itlərə, pişiklərə yem verir”.
