“Yaşıl dağ” ekoloji-sosial aksiyasında Cəlilabad Rayon İcra Hakimiyyəti Təşəkkürnamə ilə mükafatlandırılıb. Bu haqda məlumatı Cenublu.az bu gün, 23 may tarixində verir.
6-cı “Yaşıl dağ” ekoloji-sosial aksiyası Salyan rayonunun “ASAN xidmət” mərkəzində baş tutub. Burada Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, müxtəlif rayonların icra hakimiyyətlərinin nümayəndələri və qonaqlar iştirak ediblər. Tədbirə Azərbaycanın 30-dan çox şəhər və rayonundan vətəndaşlar, məktəblər, idarə və təşkilatlar qatılıblar.
Aksiyada 150 tondan çox kağız tullantıdan hazırlanmış “Yaşıl dağ”ın təqdimatı baş tutub. ASAN Könüllülərinin və məktəblilərin tullantılardan hazırladıqları əl işləri, mədəniyyət guşəsi nümayiş etdirilib, eləcə də müxtəlif musiqi nömrələri səsləndirilib.
Tədbirdə fəal iştirak edərək 23 ton kağız tullantısı təqdim etdiyi üçün Cəlilabad RİH-yə Təşəkkürnamə təqdim edilib.
Qeyd edək ki, 9 ildir fəaliyyətini davam etdirən proqram çərçivəsində 2000 tondan çox kağız tullantısı təkrar emala göndərilib, bununla 34.000-dən çox ağacın kəsilməsinin qarşısı alınıb, 400-dən çox ekoloji istiqamətdə layihə, 100-dən çox təmizlik və ağacəkmə aksiyası baş tutub.
Aksiya “Yaşıl ASAN” proqramı tərəfindən “Yaşıl dünya naminə həmrəylik ili” çərçivəsində həyata keçirilib.
