Müəllimlərin İşə Qəbulu (MİQ) imtahanında iştirak edən Cəmil Xəlilzadə bildirib ki, hazırlıq üçün kifayət qədər vaxt ayıra bilməsə də, 68,5 bal toplayıb.
Lənkəran Dövlət Universitetinin riyaziyyat və informatika müəllimliyi ixtisası üzrə məzunu olan Cəmil hazırda Yardımlı rayonunun Günəşli kənd ümumi orta məktəbində informatika müəllimi işləyir. O, bu il MİQ imtahanına ikinci dəfə qatılıb.
Namizəd hesab edir ki, nəticəsi daha yüksək ola bilərdi. Onun sözlərinə görə, imtahandakı suallar ümumilikdə standartlara uyğun olsa da, ixtisas bölməsində məntiqi təhlil tələb edən və vaxt aparan suallar yer alıb. Vaxtı düzgün bölüşdürə bilmədiyi üçün bəzi sualları cavablandıra bilməyib.
Hazırda Bakıda yaşayan Cəmil Xəlilzadə deyib ki, iş yerinin Yardımlıda olması gündəlik gediş-gəlişdə çətinlik yaradır. Buna görə də vakansiya seçimində əsas məqsədi Bakıda fəaliyyət göstərməkdir.
Mənbə: azedu.аz
