Bu gün Vətən müharibəsi şəhidimiz Əliəkbər Bəndəliyevin ad günüdür.
Əliəkbər Qulu oğlu Bəndəliyev 2001-ci il aprelin 23-də Salyanın Çadırlı kəndində doğulub.
Atasız böyüyün Əliəkbər Vətən müharibəsi zamanı könüllü savaşlara qatılıb və Suqovuşan, Hadrut istiqamətlərində döyüşlərdə iştirak edib. 2020-ci il oktyabrın 8-də şəhadətə çatıb.
Döyüş yoldaşının sözlərinə görə, müharibə zamanı baş kəşfiyyatçı və baş müşahidəçi olan Əliəkbərin verdiyi dəqiq koordinatlar sayəsində bir neçə dəfə düşmənə ağır zərbələr vurublar. 2020-ci il oktyabrın 8-i Talış-Suqovuşan istiqamətində döyüşlərə yollananda Əliəkbərin hərbi hissədə qalıb koordinat verməsini xahiş edirlər, həmçinin, "sənin atan, qardaşın yoxdur, anan təkdir, gəlmə", – deyirlər. Əliəkbər isə onları dinləmir və "hamı necə, mən də elə", – deyərək döyüşə yollanır. Relyef çətin olduğundan ərzaq maşını onlara çata bilmir və onlar 2 gün dağda, meşədə çətin vəziyyətdə qalırlar, səhər yarpaqların şehini su əvəzi içirlər. Əliəkbər həm müşahidə aparır, həm döyüşür, həm də yaralı və şəhidləri ərazidən çıxarmağa kömək edir. Növbəti dəfə yaralı döyüş yoldaşını çıxarmağa çalışarkən 10 metrliyində partlayan mina nəticəsində başına qəlpə dəyir və şəhid olur.
Ölümündən sonra "Vətən uğrunda", "Suqovuşanın azad olunmasına görə" və "Laçının azad olunmasına görə" medalları ilə təltif olunub.
