Son zamanlar Xanbulan gölünə girişin pullu olması barədə redaksiyamıza çoxsaylı müraciətlər daxil olub. İzləyicilərimiz bildiriblər ki, ötən illər ərzində giriş üçün pul alınmasa da, bu ildən etibarən ərazidə fəaliyyət göstərən çayçılar, çay sifariş edilmədiyi təqdirdə giriş üçün adambaşına 2 manat vəsait tələb edirlər.
Məsələ ilə bağlı qeyd etmək istəyirik ki, Xanbulan gölü Hirkan Milli parkının ərazisinə daxildir. Nazirlər Kabinetinin 114-cü qərarına əsasən Milli parkın ərazisinə daxil olmaq üçün adambaşına 2 manat ödəniş etmək lazımdır.
Bəs qeyd olunan vəsait kimə ödənilməlidir?
Cenublu.az məsələ ilə bağlı Ekologiya və Təbii Sərvətlər Nazirliyinin əməkdaşı Arzu Babayeva ilə əlaqə saxlayıb.
Arzu xanım qeyd edib ki, Xanbulan gölündə giriş məntəqəsi hələlik olmadığından, vəsait Milli parkın əməkdaşına və yalnız bilet qarşılığında ödənilməlidir: “Turistlər Xanbulan gölünə daxil olduqda giriş məntəqəsini görmürlər və bu səbəbdən Milli parkın əməkdaşı istənilən yerdə onlara yaxınlaşıb vəsait istəyə bilər. Gələcəkdə Xanbulan gölünə də giriş məntəqəsinin qoyulması nəzərdə tutulub”.
Bəs Milli parklara giriş pulundan kimlər azaddır?
Nazirliyin əməkdaşı həmçinin əlavə edib ki, giriş pulundan Milli Qəhrəmanlar, ərazi bütövlüyü uğrunda döyüşlərdə iştirak etmiş şəxslər (müvafiq təsdiqedici sənədi təqdim etməklə), məktəbəqədər uşaqlar, məktəblilər və onları müşayiət edən müəllimlər azaddırlar.
“Bəzən şəhid ailələrinin də giriş pulundan azad olunduğu düşünülür və bu, mübahisələrə səbəb olur. Lakin onlar istənilən Milli parkın ərazisinə daxil olarkən giriş pulu ödəməlidilər”, - deyə nazirliyini rəsmisi əlavə edib.
