Bir il öncə, 16 avqust 2021-ci ildə Dövlət Sərhəd Xidmətinin Sahil Mühafizəsinin Cənub regional şöbəsinin əməkdaşı, baş leytenant Əlihüseyn Əlizadə Astara-Şahağacı yolunda keçirdiyi qəza nəticəsində dünyasının dəyişmişdir. Bununla bağlı zabitin bacısı - aparıcı Vüsalə Əizadə İnstagram hesabında paylaşım edib.
"Biz yaxşı deyilik, amma yaxşı görünürük, hətta çox yaxşı... Başı çəkməyənə, canı yanmayana, ürəyimizin dağından xəbəri olmayana, içi çirkabla dolana, sən demiş, qoy elə bilsinlər. Bacılarla göz-gözə gələndə qaçırırıq gözlərimizi, amma hərdən hönkürüb atırıq qəhərimizi, sən boyda acımız var ürəyimizdə, bir az gileylənirik arxanca, beş bacının qardaşı belə vəfasız olar? Anam gözləyir səni, barışmır yoxluğunla, səsli mesajlarına hər gün indi yazmısan kimi qulaq asır, budur təsəllisi, paltarlarından alır iyini bir də Rafaelindən. O böyüyüb, eyni sən: dəcəl, səbirsiz, cəsur, çox yaraşıqlı, hə, güləndə sənin kimi qəmzəsi də var yanağında. Yadındasan, heç unutmadı, unutdurmarıq. Hüseynə zəng edək danışım deyir, hə, bax ondadı bizim xısın-xısın ağlayıb, bir-bir gözündən itdiyimiz məqam. Ata uzağa gedib, işləyir, sənə pul göndərir, oğlum böyüsün, oxusun, mənim kimi vətənini sevən igid, insan, kişi olsun deyirik, hələ ki aldada bilirik….. Nigaran qalma, balan sənin əziyyətinin, Vətən keşiyində qoyduğun canın, zəhmətin haqqı ilə böyüyür, sənin çörəyini yeyir, gözün arxada qalmasın, hər şey var, bircə sən yoxsan…”.
