Lerikdə qadın sosial şəbəkə vasitəsilə şantaj olunub.
Belə ki, 31 yaşlı Mikayıl Dadaşov (şərti adla) sosial şəbəkədə hədə-qorxu ilə pul tələb etməkdə ittiham olunub.
Məlumata görə, o, TikTok sosial şəbəkəsində saç ustası olan qadının foto və video görüntülərini telefonuna yükləyib. Daha sonra həmin görüntülərin üzərinə nalayiq ifadələr və təhqiramiz sözlər əlavə edərək zərərçəkənə göndərib. Mikayıl özünə məxsus "Momento more" adlı səhifədən qadına yazaraq görüntüləri yaymaması müqabilində ondan 50 manat pul istəyib. Bundan əlavə, başqa vaxt da qadına mesaj yazaraq intim münasibət təklif edib.
Qadın bu təklifləri rədd edərək Mikayıl Dadaşovu sosial şəbəkədə bloklayıb. Bundan sonra Mikayıl qadın barəsində hazırladığı rüsvayedici görüntüləri "Instagram"da özünə məxsus bir neçə səhifədə yayıb.
Zərərçəkənin şikayəti əsasında M. Dadaşov saxlanılıb və barəsində Cinayət Məcəlləsinin 182.1-ci (hədə-qorxu ilə tələb etmə) maddəsi ilə cinayət işi başlanıb.
M. Dadaşov ifadəsində pul qazanmaq üçün insanları şantaj etmək yolunu seçdiyini bildirib. O, ilk olaraq zərərçəkən qadına yazdığını deyib. Əməlindən peşman olduğunu bildirərək barəsində yüngül cəza verilməsini xahiş edib.
Zərərçəkən qadın da ifadəsində təqsirləndirilən şəxsə qarşı şikayət və tələbinin olmadığını bildirib. Onun sözlərinə görə, Mikayıl telefon danışığı zamanı pul göndərməyəcəyi təqdirdə onun evinə gəlib zorlayacağını da deyib.
Məhkəmənin qərarı ilə M. Dadaşov 3 il müddətinə azadlıqdan məhrum edilib.
Mənbə: lent.аz
