Lənkəran Şəhər İcra Hakimiyyətinin başçısı Taleh Qaraşov növbəti səyyar qəbul-görüşünü Günəhir, Türkəncil və Qodəsə kəndlərinin sakinləri ilə keçirib. Bu haqda məlumatı Cenublu.az bu gün, 20 iyul tarixində verir.
Görüşdə icra başçısı ilə birlikdə İcra Hakimiyyəti aparatının məsul şəxsləri, rayonun hüquq-mühafizə orqanlarının, əlaqədar təşkilatların və xidmət sahələrinin rəhbər işçiləri də iştirak ediblər.
Taleh Qaraşov çıxışında dağ kəndlərinin əhalisinin qış aylarında istiliklə təminatına toxunaraq bildirib ki, sözügedən məsələ onun şəxsi nəzarətindədir. O qeyd edib ki, Lənkəranın 95,9 faizi tam qazlaşdırılıb və digər ərazilərin qazla təminatı Dövlət Proqramına daxil edilib. Onların da yaxın müddətdə tam şəkildə qazlaşdırılması nəzərdə tutulur.
İcra başçısı əhalinin həssas təbəqələri tərəfindən qaldırılan və icra hakimiyyətinin səlahiyyətlərinə aid olan məsələlərin həlli istiqamətində göstərişlərini verib və icra hakimiyyətinin səlahiyyətlərinə aid olmayan məsələlərin həlli üçün aidiyyəti qurumlara rəsmi müraciətlərin edilməsi və nəticəsi barədə vətəndaşlara məlumat verilməsini tapşırıb.
Qeyd edək ki, Taleh Qaraşov 21 iyul 2022-ci il tarixində Günəhir kənd sakinlərini qəbul edib.
