Lənkəranda “Təhsilin əlçatanlığı və əhatə dairəsinin genişləndirilməsi” adlı layihəyə start verilib. Bu haqda məlumatı Cenublu.az bu gün, 19 iyul tarixində verir.
Lənkəran Dövlət Universitetində (LDU) təşkil edilən tədbirdə tələbələr, yuxarı sinif şagirdlərinin valideynləri və məktəb müəllimləri iştirak ediblər. Tədbir iştirakçıları təhsil tələbə kreditlərinin verilməsi, informasiya sisteminin tələbə portalından istifadə qaydaları, o cümlədən tələbə kreditindən kimlərin, hansı hallarda, hansı şərtlərlə və güzəştlərlə istifadə edə biləcəyi barədə məlumat alıblar.
Təhsil tələbə kreditinin ayrılmasında məqsəd təhsilin hamı üçün əlçatanlığının təmin edilməsi və təhsilin əhatə dairəsinin genişləndirilməsidir. Sözügedən kredit dövlət dəstəyi ilə çox kiçik faizlərlə və uzun müddətə verilir. Nazirlər Kabineti tərəfindən təsdiqlənmiş müvafiq qaydaya əsasən, sosial və standart olmaqla bu kreditin iki növü mövcuddur. Güzəştli şərtlərlə verilən sosial təhsil tələbə kreditindən yalnız sosial həssas təbəqəyə aid ailələrdən olan tələbələr üçün nəzərdə tutulub.
Təhsilin nəticələrindən asılı olaraq, kredit üzrə faizlərin hesablanması və kreditin ödənilməsi zamanı güzəştlər tətbiq edilir. Tələbələr krediti məzun olduqdan və güzəşt müddəti bitdikdən sonra ödəyə bilərlər.
Qeyd edək ki, tədbir Tələbə Təhsil Kredit Fondu və “Regional İnkişaf” İctimai Birliyinin birgə təşkilatçılığı ilə keçirilib.
