Masallı meşələrində məskunlaşmış su hövzəsi quşları meşəyə ciddi ziyan vurur. Bu haqda məlumatı Cenublu.az bu gün, 20 iyul tarixində Report-a istinadən verir.
Quşların məskunlaşması Masallının Kalinovka kəndi ərazisindəki meşə zolağında qeydə alınıb. Kənd sakinləri quşların 2-3 aydır bu ərazidə məskunlaşaraq ağaclarda yuva qurması və meşə ərazisində çoxlu sayda quş leşi olması barədə ekologiya idarəsinə bildiriblər.
Qızılağac Milli Parkının böyük elmi işçisi Müstəqim Bəşirov meşə ərazisində məskunlaşan quşların, əsasən, Misir ağ və boz vağları olduğunu deyib. Onun sözlərinə görə, quşların Qızılağac Milli Parkı ərazisindən təqribən 5 km uçaraq yerdəyişmələrinin səbəbi qida ilə bağlıdır:
"Meşə ərazisinə yaxın yerlərdə yonca, buğda sahələri var ki, quşlar da bu sahələrə daraşan qurd, çəyirtkələrlə qidalanırlar. Quşlar təsərrüfatlar üçün xeyirli olsa da, meşə təsərrüfatına ciddi ziyan vurub. Belə ki, onların ifrazatı ağacın budaqlarını, yarpaqlarını zədələyir, bu da gələcəkdə ağacın qurumasına səbəb ola bilər".
Ekoloq vurğulayıb ki, quşların yerdəyişməsi müvəqqətidir və 1-2 aydan sonra onlar yenidən su hövzələrinə geri dönəcək.
