Lənkəranda intihar edən stomatoloq, 33 yaşlı Müşfiq Zaman oğlu Bağırovun ailəsi onun ölümü ilə bağlı açıqlama verib. Bu haqda məlumatı Cenublu.az bu gün, 25 avqust tarixində Qafqazinfo-ya istinadən verir.
Mərhumun ailəsi onun hədə-qorxu səbəbindən həyatına qəsd etdiyini bildirib: “Hazırda faktla bağlı istintaq tədbirləri getdiyinə görə bəzi məsələləri tam açıqlaya bilmirik. Amma bir şeyi deyə bilərik ki, Müşfiqin boynuna külli miqdarda pul vəsaitini verməsini qoymaqla ona təzyiq edilib. Bu məcburiyyət qarşısında qalan Müşfiq valideynlərinə, yaxınlarına başına gələnləri bildirmək istəməyib və intihar edərək həyatına son qoyub. Bununla bağlı kifayət qədər dəlil-sübutlar da var. Həmin sübutlar, yazışmalar, Müşfiqin istifadəsində olan mobil telefon araşdırılması üçün prokurorluq əməkdaşları tərəfindən götürülüb. Hadisə baş verdikdən dərhal sonra Müşfiqin çiyələk biznesi ilə məşğul olduğu və bununla bağlı intihar edə biləcəyi barədə məlumatlar yayıldı. Bildirmək istəyirik ki, bu barədə deyilənlər məsuliyyətdən yayınmaq istəyən şəxslər tərəfindən ortaya atılan şayiələrdir. Müşfiq avtomobil biznesi ilə məşğul olub və stomatoloq kimi fəaliyyət göstərib. Onun atası və qardaşı da stomatoloqdurlar. Biz Lənkəran prokurorluğundan, Baş prokuror Kamran Əliyevdən xahiş edirik ki, bu məsələ tam araşdırılsın, Müşfiqi intihara vadar edən şəxslər məsuliyyətə cəlb edilsin”.
Məsələ ilə bağlı Baş Prokurorluğun Mətbuat xidmətindən bildirilib ki, faktla bağlı başlanılmış cinayət işi üzrə istintaq davam edir.
