Kiçik Qızılağac Balıqartırma Təsərrüfatında yetişdirilən çəkikimi balıq körpələri Lənkəranda yerləşən Sınıqkörpü kanalına buraxılıb. Bu haqda məlumatı Cenublu.az bu gün, 23 may tarixində verir.
Mərasimə Ekologiya və Təbii Sərvətlər Nazirliyinin, Bioloji Müxtəlifliyin Qorunması Xidmətinin, Qızılağac Milli Parkının, Daxili İşlər Nazirliyinin Su Nəqliyyatında Polis İdarəsinin Lənkəran Xətt Polis şöbəsinin, Lənkəran rayon İcra Hakimiyyətinin nümayəndələri, tələbələri və məktəblilər cəlb olunublar.
Beynəlxalq Biomüxtəliflik Günü ilə əlaqədar keçirilən tədbirin məqsədi su hövzələrinin zənginləşdirilməsi, balıq populyasiyasının təbii artımına və bərpasına töhfə verməkdir.
