Qeyri-neft sektorunun inkişafı üçün görülən işlər çərçivəsində rayonlarda baramaçılığın, sitrus və subtropik meyvə bağlarının da salınmasına investisiyalar qoyulub.
Belə bağlardan biri Lənkəranın Separadi kəndi ərazisində 150 hektar sahədə salınan sitrus bağıdır. Bağda meyvə ağaclarını qış aylarında şaxtadan qoruyan xüsusi üsuldan – “pərvanələrdən” istifadə olunur. Respublikada ilk dəfə burada istifadə olunan avadanlıqlar qış aylarında temperaturu normal dərəcədə saxlayır və beləliklə meyvələri şaxta vurmur.
Təsərrüfat rəhbəri Nasir Cəfərzadə bildirib ki, bağda, əsasən, şaftalı, nektarin, limon, mandarin bitir.
“150 hektarın üstünü bağlamaq mümkün deyil. “Pərvanə” Türkiyədən gəlib, birinci gələndə 1 dənəsi 6 hektarı şaxtadan mühafizə edirdi. Yeni gələnlər artıq 9 hektarı mühafizə edir. Ümumilikdə 15 ”pərvanə” var”, - deyə o əlavə edib.
Bağda 135 minə yaxın sitrus meyvə ağacı əkilib və bağın salınmasında, əsasən, xarici sort toxumlardan istifadə olunur.
Bağın suvarılmasında isə müasir suvarma şəbəkəsi olan damcı üsulundan istifadə olunur. Təsərrüfat rəhbəri cari ildə 3 min ton məhsul əldə ediləcəyini gözləyir. Məhsullar, əsasən, daxili bazara çıxarılsa da, bu ildən Rusiya bazarına da ixracı planlaşdırılır.
Qeyd edək ki, bağda 100 nəfərdən çox sakin daimi, 300 nəfər isə mövsümi işlə təmin olunub.
