Lənkəranda “Şahin” hərbi-idman oyununun respublika final mərhələsi başa çatıb. Bu haqda məlumatı Cenublu.az bu gün, 11 iyun tarixində verir.
Ümumtəhsil məktəblərinin X sinif şagirdləri arasında keçirilən oyunun final mərhələsi məktəblilərin hərbi orkestrin ifası altında təntənəli marşla mərkəzi meydana daxil olması ilə başlayıb. Sonra ümummilli lider Heydər Əliyevin və şəhidlərin xatirəsi bir dəqiqəlik sükutla yad edilib. Hərbi orkestrin müşayiəti ilə Azərbaycanın Dövlət Himni səsləndirilib.
Tədbirdə gənclər və idman naziri Fərid Qayıbov, icra başçısı Taleh Qaraşov, tərəfdaş qurumların rəhbər nümayəndələri, qonaqlar və 200-dən çox gənc iştirak ediblər.
Yarışda ümumilikdə 9 komanda sıra, fiziki, mülki-müdafiə hazırlığı və maneələrin dəf olunması, eləcə də digər mərhələlər üzrə tapşırıqları icra ediblər.
Yekun nəticələrə əsasən, 1-ci yerə Xaçmaz, 2-ci yerə Oğuz, 3-cü yerə isə Sabunçu rayon komandaları layiq görülüblər.
Qaliblər diplom, kubok və hədiyyələrlə mükafatlandırılıblar.
