Kürdəmir rayon sakini, şəhid Cəmil Həşimlinin anası, 52 yaşlı Simuzər Bağıyeva orta məktəbi bitirdikdən 35 il sonra, bu il Lənkəran Dövlət Universitetinə qəbul olub. Bu haqda məlumatı Cenublu.az bu gün, 23 yanvar tarixində Azertac-a istinadən verir.
Hazırda Lənkəran Dövlət Universitetinin 1-ci kurs tələbəsi olan Simuzər xanım uzun illər orta ixtisas təhsili üzrə rayon xəstəxanasında tibb bacısı işləyib. Bununla kifayətlənməyərək o, ötən il fərdi qaydada hazırlaşaraq imtahanlarda iştirak edib. Keçid balını toplayaraq Simuzər Bağıyeva tələbə adını qazanıb.
Onun 3 oğlu İkinci Qarabağ müharibəsinin iştirakçısı olub. Böyük və kiçik övladları müharibədən sağ-salamat qayıtsalar da, ortancıl oğlu gizir Cəmil Həşimli şəhidlik zirvəsinə ucalıb. Oğlunun şəhidlik zirvəsinə yüksəlməsindən bir müddət sonra özünü toparlayaraq yenidən ayaqları üstə durmağı bacaran ana övladının arzularını reallaşdırmağa qərar verib.
Günün bir neçə saatını dərslərinə ayıran Simuzər xanım qarşıdan gələn imtahanlara hazırlaşır:
“Mən şəhid anasıyam, dərsimi oxumayım deyə bir şey yoxdur. Dərslərimi oxuyuram. Hələ bundan sonra arzum var ki, Qarabağ Universitetində magistraturanı oxuyum. Allahdan mən ömür yox, möhlət istəyirəm”.
Bu payız tələbə adı ilə bərabər nənə adını da qazanan qəhrəmanımız asudə vaxtını nəvəsi ilə keçirir. Vaxtı olanda o, ev işlərində gəlininə də kömək etməyi unutmur.
[caption id="attachment_52488" align="alignnone" width="336"]
Foto Azərtac[/caption]
