Astara Rayon İcra Hakimiyyətinin başçısı Qəzənfər Ağayev Suparibağ inzibati ərazi dairəsi üzrə nümayəndəliyin Rudəkənar kəndində vətəndaşları qəbul edib. Bu haqda məlumatı Cenublu.az bu gün, 15 fevral tarixində verir.
Görüşə rayonun idarə, müəssisə və təşkilatlarının rəhbərləri də cəlb olunublar.
İcra başçısı əvvəlcə növbədənkənar Prezident seçkilərində mütəşəkkilliyə və layiqli namizədə səs verdiklərinə görə görüş iştirakçılarına təşəkkürünü bildirib.
Vətəndaşlar içməli su xəttinin çəkilməsi, Rudəkənar kəndinin Astara şəhərinə birləşdirilməsi, avtomobil yolunda səki salınması üçün materialların verilməsi, aztəminatlı ailəyə maddi yardım edilməsi, Vətən müharibəsi qazisinə sığortasının alınmasında köməklik göstərilməsi üzrə müraciətləri səsləndiriblər.
İcra başçısı qaldırılan məsələlərin həlli ilə bağlı idarə və müəssisə rəhbərlərinə tapşırıqlar verib.
