Bazarlarda qarpızın qiymətinin ötən illə müqayisədə bahalaşması alıcıların narazılığına səbəb olub. Fermerlər isə qiymət artımının əsas səbəbinin istehsal xərclərinin yüksəlməsi olduğunu bildirirlər.
Cenublu.az xəbər verir ki, əkinçilərin sözlərinə görə, torpaq icarəsi, mineral gübrələr, bitki mühafizə vasitələri, yanacaq və işçi qüvvəsinin xərcləri əhəmiyyətli dərəcədə artıb. Bu da məhsulun maya dəyərinə birbaşa təsir göstərib.
Fermerlər qeyd edirlər ki, bu il qeyri-sabit hava şəraiti məhsuldarlığı azaldıb. Yağıntılar və temperatur dəyişiklikləri nəticəsində əvvəlki illərlə müqayisədə daha az məhsul əldə olunub.
Onların sözlərinə görə, əvvəllər məhsulun böyük hissəsi xarici bazarlara, xüsusilə Rusiyaya ixrac edilsə də, hazırda satış imkanları məhdudlaşıb. Buna baxmayaraq, artan istehsal xərcləri səbəbindən qarpızın qiymətində ucuzlaşma müşahidə olunmur. Nəticədə alıcılar bu mövsüm qarpızı ötən illə müqayisədə daha yüksək qiymətə almağa məcbur qalırlar.
