Mənzil oğurluqlarına görə tutulan Cəlilabad sakininin evindən tapança aşkar edilib. Bu haqda məlumatı Cenublu.az bu gün, 16 yanvar tarixində verir.
Cəlilabad Rayon Polis Şöbəsinin əməkdaşları əməliyyat-axtarış tədbirləri həyata keçiriblər. Məlum olub ki, rayonda yerləşən 3 evdən dəyəri 6 min manatdan artıq müxtəlif məişət əşyaları oğurlanıb. Nəticədə soyğunçuluqda şübhəli bilinən Cəlilabad sakinləri: Səməd Səfərov, əvvəllər məhkum olunmuşlar - Xaləddin Əliyev və Azər Qəhrəmanov saxlanılıblar.
Bundan əlavə, saxlanılan Xaləddin Əliyevin yaşadığı evdən 1 ədəd "Makarov" tipli tapança, həmin silaha aid daraq və 5 ədəd patron tapılaraq müsadirə edilib.
Məhkəmənin qərarı ilə X.Əliyev və A.Qəhrəmanov həbs olunublar, S.Səfərov barəsində isə digər qətimkan tədbiri seçilib.
Faktla bağlı araşdırma aparılır.
