Neftçala rayonunun Xıllı qəsəbəsində yay aylarında havaların isti keçməsi nəticəsində duz göllərində su buxarlanır, səthdə duz kristalları əmələ gəlir və yığım işlərinə başlanılır. Duz əsasən əl əməyi ilə toplanır. İşçilər xüsusi alətlərdən istifadə edərək kristallaşmış duzu yığır və emala göndərilməsi üçün hazırlayırlar.
Hava şəraitindən asılı olan bu proses ən çox quraq və günəşli günlərdə aparılır. Xıllıda hasil olunan təbii duz qida sənayesi ilə yanaşı, müxtəlif istehsal sahələrində də istifadə edilir.
Duzçuluq qəsəbə sakinlərinin əsas məşğulluq sahələrindən biri hesab olunur və mövsüm ərzində çoxsaylı yerli sakin bu sahədə çalışır.
