Lənkəran Dövlət Universitetinin rektoru Natiq İbrahimov regionlarda fəaliyyət göstərən universitetlər barədə danışıb. Bu haqda bu gün, 22 avqust tarixində Cenublu.az Azedu.az-a istinadən xəbər verir.
Son illər regionlarda fəaliyyət göstərən ali təhsil müəssisələrinin nəticələri mərkəzdə yerləşən universitetlərə yaxınlaşmaqdadır. Lakin əhalidə regionlarda fəaliyyət göstərən universitetlərdə təhsilin keyfiyyətinin aşağı olması kimi fikir formalaşır.
Natiq İbrahimov isə bunun tam əksini söyləyir. “Ali məktəblər bir-birindən fərqli kadr hazırlayırlar. Düşünmürəm ki, Lənkəran Dövlət Universiteti hansısa pedaqoji kadr hazırlayan universitetlərdən geri qalır. Ümumi götürdükdə regionlarda ali təhsil alan şəxslər daha aşağı nəticə ilə qəbul olunurlar. Lakin mərkəzi universitetlərə yüksək balla qəbul həyata keçirilir”, - deyə rektor qeyd edib.
Onun sözlərinə görə, LDU heç də paytaxt universitetlərindən geri qalmır.
“Hazırda Lənkəran Dövlət Universiteti son 5-6 il ərzində bütün laboratoriya və bir çox texnoloji yeniliklərlə təchiz edilib. Burada kimya, biologiya, baytarlıq, aqrar, torpaqşünaslıq ixtisası üzrə laboratoriyalar fəaliyyət göstərir. Hazırda tələbələr bu laboratoriyalarda elmi-praktiki təcrübələr keçir. Bu, Amerika, Fransa, İngiltərə və Almaniya istehsalı olan laboratoriyalardır. Mən yenə də öz fikrimdə qalıram ki, mərkəzdə yerləşən universitetlər daha yaxşı kadr hazırlayır fikri doğru deyil”, - deyə Natiq İbrahimov bildirib.
