Bu gün Azərbaycanın Milli Qəhrəmanı Paşa Təhməzovun doğum günüdür.
Paşa Qurban oğlu Təhməzov 23 mart 1949-cu ildə Lənkəran şəhərində anadan olub. Şəhər 6 saylı orta məktəbi bitirdikdən sonra Əhaliyə Məişət Xidməti İstehsalat Kombinatında usta köməkçisi kimi işləməyə başlayıb.
1993-cü ilin avqustunda Azərbaycanın cənub bölgəsində vəziyyət gərginləşəndə o, "Talış Muğan Respublikası" adı ilə baş qaldıran daxili çəkişmələrin qarşısını almağa yollanıb. Cinayətkar dəstə ilə baş verən qarşıdurma nəticəsində Paşa Təhməzov 44 yaşında qəhrəmancasına həlak olub.
O, Lənkəran şəhərinin Şəhidlər Xiyabanında dəfn olunub. Ailəli idi, üç övladı yadigar qalıb.
Lənkəran şəhərindəki küçələrdən biri onun adını daşıyır. Yaşadığı binanın önünə xatirə lövhəsi vurulub, "23 Avqust" meydanında büstü qoyulub.
Azərbaycan Respublikası prezidentinin 24 avqust 1993-cü il tarixli 740 saylı fərmanı ilə Təhməzov Paşa Qurban oğluna ölümündən sonra "Azərbaycanın Milli Qəhrəmanı" adı verilib.
