Masallı rayonunun Miyankü kəndində yerləşən Nadir Aslanov adına tam orta məktəbdə transformatorun sıradan çıxması ilə bağlı problem aylardır həll olunmayıb.
Valideynlərin sözlərinə görə, transformator iyun ayında partlayıb və yeni tədris ili başlasa da, məktəbin elektrik enerjisi ilə təminatı bərpa edilməyib. Onlar bildiriblər ki, sinif otaqları qaranlıq qalır. Bununla yanaşı, su problemi də yaşanır.
Valideynlər suyun olmamasının məktəbdə sanitar vəziyyətlə bağlı narahatlıq yaratdığını deyiblər. Onların sözlərinə görə, məsələ ilə bağlı aidiyyəti qurumlara dəfələrlə müraciət etsələr də, problemin nə vaxt həll olunacağı barədə konkret məlumat verilməyib.
Məktəbdən bildirilib ki, transformatorun sıradan çıxması və elektrik enerjisi ilə bağlı problemin aradan qaldırılması üçün aidiyyəti qurumlarla birgə zəruri tədbirlər görülür. Qeyd olunub ki, transformatorun təchizatı müəyyən texniki və təşkilati mərhələlərdən keçir və proses başa çatdıqdan sonra məktəbin elektrik enerjisi ilə təminatı bərpa ediləcək.
Məktəbdə suya olan ehtiyacın isə hazırda kənar mənbələr hesabına təmin edildiyi bildirilib.
Mənbə: qafqazinfo.аz
