Masallının İsgəndərli kənd sakini Aqil Süleymanlı dülgərlik sənətini yaşadır. Bu haqda bu gün, 19 avqust tarixində Cenublu.az Azərtac-a istinadən xəbər verir.
Aqil dülgər ailəsində dünyaya göz açıb. O, bu sənətinin sirlərini atasından öyrənib. 28 yaşlı gənc ilk dəfə meşədən topladığı quru ağac parçalarından müxtəlif formalar düzəltməyə başlayıb. Bu sənətə marağı da elə o gündən yaranıb. Aqil müxtəlif suvenirlər, saatlar, gül dibçəkləri hazırlayaraq, satışa çıxarır. O, əl işlərini hazırlayarkən qoz və palıd ağaclarına üstünlük verir. Gənc sənətkar əvvəlcə kompüter vasitəsilə yaradacağı əl işinin 3D modelini çıxarır, daha sonra onu hazırlamağa başlayır. Bir suvenirin ərsəyə gəlməsi üçün təqribən 5 gün vaxt gedir.
Qeyd edək ki, Aqil Süleymanlının əl işlərini Masallı və ətraf rayonlardan gələn müştərilər alır və onları öz evlərinin, həmçinin ictimai iaşə obyektlərinin interyer dizaynında istifadə edirlər.
