Masallı rayonu, Qəriblər kəndi ərazisində yerləşən "Park Masallı" restoranının ərazisində ağacların kökündən çıxarılması sakinlərin narazılığına səbəb olub.
Şikayətdə bildirilib ki, ağacların kəsilməsinə səbəb restoran ərazisinin genişləndirilməsidir.
Dövlət Ekoloji Təhlükəsizlik Xidməti faktı təsdiqləyib.
Qeyd olunub ki, "Park Masallı" restoranının ərazisində ağacların kökündən çıxarılması ilə bağlı Dövlət Ekoloji Təhlükəsizlik Xidmətinə daxil olan məlumat 1 saylı Regional Ekologiya və Təbii Sərvətlər İdarəsinin əməkdaşları tərəfindən yerində araşdırılıb və fakt təsdiqini tapıb.
İdarənin rəisi Rafiq Ədilov bildirib ki, araşdırma zamanı restoranın ərazisindəki 9 tuya ağacının qanunsuz olaraq kökündən çıxarıldığı və yerinin dəyişdirildiyi müəyyən edilib.
"Faktla bağlı akt tərtib olunub. Restoranın icraçı direktoru Elman Cəlalzadə barəsində vəzifəli şəxs qismində protokol tərtib edilərək onun 4 000 manat məbləğində cərimə olunması istiqamətində tədbirlər görülür. Köçürülən ağacların yerinə yeni tinglər əkilib. Eyni zamanda, həm köçürülən, həm də yeni əkilən tinglərə qulluq göstərilməsi və mühafizəsinin təşkili məqsədilə restoranın icraçı direktoruna "Ekoloji tələb" verilib", - deyə R.Əliyev bildirib.
Mənbə: oxu.az
