Masallıda Milli Qəhrəman Mübariz İbrahimov haqqında çəkilən bədii filmin təqdimatı olub. Bu haqda məlumatı Cenublu.az bu gün, 14 iyul tarixində verir.
Rayon Heydər Əliyev Mərkəzində keçirilən mərasimdə Masallı Rayon İcra Hakimiyyətinin başçısı Araz Əhmədov və digər rayon rəsmiləri, şəhid ailələri, ictimaiyyət nümayəndələri iştirak ediblər.
Təqdimat öncəsi Heydər Əliyevin və şəhidlərimizin əziz xatirəsi bir dəqiqəlik sükütla yad olunub.
Sonra “Azərbaycan Televiziya və Radio Verilişləri” QSC-nin istehsalı olan “Mübariz” tammetrajlı bədii filmi nümayiş edilib.
Masallı Rayon İcra Hakimiyyətinin başçısı Araz Əhmədov gənc nəslə vətənpərvərlik ruhunun aşılanmasında mühüm əhəmiyyətə malik “Mübariz” filminin ərsəyə gəlməsində zəhməti olan hər kəsə, eləcə də yaradıcı heyətə minnətdarlığını bildirib, Azərbaycanın igid, qəhrəman övladlarının ümumiləşdirilmiş obrazı kimi təqdim edilən Mübariz İbarahimovun ömür və döyüş yolundan bəhs edən filmin çəkilişini yüksək dəyərləndirib.
Filmin baş prodüseri və ssenari müəllifi Nicat Mənalı, quruluşçu rejissoru Natiq Novruzov, aktrisa Flora Hüseynova çıxışlarında qeyd ediblər ki, 2 ilə yaxın müddətə başa gələn 90 dəqiqəlik film qəhrəmanımızın beş yaşından şəhidlik zirvəsinə qədər ucalan şərəfli həyat yolundan bəhs edir. Çəkilişlər ölkəmizin müxtəlif bölgələrində, o cümlədən qəhrəmanımızın doğulduğu doğma Biləsuvar rayonunda və döyüşüb şəhadətə qovuşduğu Tərtər rayonunda yerləşən hərbi mövqedə aparılıb.
Tədbirin sonunda filmin ssenari müəllifi Nicat Mənalı və quruluşçu rejissoru Natiq Novruzova Masallı rayon İcra Hakimiyyəti Başçısının fəxri fərmanları təqdim olunub.
