Masallı rayon Mahmudavar kənd ümumi orta məktəbinin 9-cu sinif şagirdinin 30 yaşlı kişiyə ərə getməsi xəbəri yayılıb. Bu haqda məlumatı Cenublu.az bu gün, 23 may tarixində Qafqazinfo.az-a istinadən verir.
Məlumata görə, artıq yeniyetmənin toy tarixi də müəyyənləşdirilib.
DİN-in mətbuat xidmətinin regional qrupundan bildirilib ki, məsələ artıq nəzarətə götürülüb. Məsələ ilə bağlı şagird və onun hər iki valideyni, nişanlandığı iddia olunan oğlan və onun atası Masallı Rayon Polis Şöbəsinə dəvət olunublar. Masallı Rayon İcra Hakimiyyətinin, Masallı rayonu üzrə təhsil sektorunun və Masallı RPŞ-nin müvafiq əməkdaşlarının iştirakı ilə valideynlərlə profilaktik söhbətlər aparılıb və akt tərtib olunub.
Belə ki, 16 yaşlı yeniyetmə qız hazırda təhsilini davam etdirir və davamiyyətinə nəzarət olunur.
Qeyd edək ki, sözügedən şagird cari tədris ilində həmin məktəbin IX sinfində təhsil aldığı müddətdə müntəzəm olaraq dərslərə davam edib, davamiyyətində problem olmayıb, məktəbdə özünü intizamlı şagird kimi aparıb, eyni zamanda buraxılış imtahanında da iştirak edib.
