Masallıda Xalq artisti Hacı İsmayılovun anadan olmasının 80 illik yubileyinə həsr olunmuş mərasim təşkil edilib. Bu haqda məlumatı Cenublu.az bu gün, 23 yanvar tarixində verir.
Tədbir Mərkəzi Kitabxanada baş tutub. Burada kitabxananın əməkdaşları Gülər Piriyeva və Mərdan İsgəndərov çıxış edərək sənətkar haqda məlumat veriblər.
Qeyd edək ki, Hacı İsmayılov kino sahəsində çalışmazdan öncə Sumqayıt və İrəvan teatrlarında müxəlif rollar ifa edib. 1970-ci ildən Akademik Milli Dram Teatrında səhnə fəaliyyətini davam etdirib. Azərbaycan kinostudiyasında ilk dəfə “Ad günü” filmində Mustafa rolunda çəkilib və 22 aprel 1989-cu ildə Dövlət Mükafatı Laureatı adına layiq görülüb. 2014-cü ildən Azərbaycan Teatr Xadimləri İttifaqının yaradıcılıq üzrə sədr müavinidir. Kino və teatrın inkişafında mühüm xidmətlərinə görə dövlət tərəfindən fəxri adlar, orden və medallarla təltif olunub.
