Masallıda gənclərin xalq tətbiqi sənəti ilə yaxından tanış olmaları üçün tədbir təşkil olunub. Bu haqda bu gün, 19 avqust tarixində Cenublu.az Masallı Regional Mədəniyyət idarəsinə istinadən xəbər verir.
Tədbir Mədəniyyət idarəsi və Masallı GİKM-in təşkilatçılığı ilə keçirilib. “Sənət və sənətkarlar” adlı tədbirdə gənclər Ərkivan qəsəbəsinin sakini, dulusçu Cəsarət Nuriyevin emalatxanasında olublar. Orada iştirakçılar dulusçuluq sənətinin incəlikləri haqda məlumatlar alıblar.
Tədbirin növbəti günündə gənclərimiz Şatıroba kənd sakini, həsirçi Fəridə Həşimovanın qonağı olublar. Sənətkar pizə və lığdan həsir, zənbil, papaq, tərəzi və digər əşyaların hazırlanma prosesi, eləcə də həsir toxumaq üçün istifadə olunan dəzgah haqqında tədbir iştirakçılarına geniş məlumat verib. Daha sonra iştirakçılar Fəridə Həşimovanın köməyi ilə həsirtoxuma prosesində iştirak ediblər.
