Masallı sakini qisas almaq məqsədi ilə həmkəndlisini öldürüb.
Cenublu.az-ın əldə etdiyi məlumata görə, hadisənin istintaqı Lənkəran Ağır Cinayətlər Məhkəməsində keçirilib.
Belə ki, təqsirləndirilən Aslan Ağazadə 1994-cü ildə Masallı rayonunda anadan olub. O, həmkəndlisi Seymur Alişanova qarşı illərdir içində kin bəsləyib. Buna səbəb Seymurun 9 il əvvəl Rusiyada əmisini öldürməsi, daha sonra əmisi arvadı Şəmsiyyə ilə sevgi münasibəti yaşaması olub.
Aslan ötən ilin may ayında Seymurun Rusiyadan Masallıya gəldiyi xəbərini aldıqda onu öldürmək qərarına gəlib. Cinayətkar niyyətini həyata keçirmək üçün evdə saxladığı ov tüfəngini və qatlanan bıçağı götürərək Seymurun yemək yediyi kafeyə gəlib. Qisas niyyəti ilə əvvəlcə tüfəngdən atəş açıb, ardınca bıçaqla 5 dəfə xəsarət yetirib.
Aslan Ağazadə Azərbaycan Respublikası CM-nin 120.2.1, 120.2.4 və 232.1-ci maddələri ilə təqsirləndirilib.
Təqsirləndirilən Aslan Ağazadənin hadisəni anlaqsız törətdiyi məlum olub. O, ibtidai istintaqda verdiyi ifadədə özünü təqsirli bilməyib:
“Seymur Alişanov təxminən 9 il bundan əvvəl Rusiya Federasiyasının Murmansk şəhərində yaşayan əmim Cabiri bıçaqlayıb. Hadisədən sonra oradan qaçaraq Azərbaycana gəldiyi üçün onu öldürməyə fürsət tapa bilmədim. Ötən ilin may ayında Masallıya gəldiyini eşitdim. Eşitdim ki, əmim arvadı Şəmsiyyə ilə görüşür, sevgi münasibəti yaşayır. Hadisə günü təsadüfən kafedə Seymurun oturduğunu gördüm. Tüfəngi götürüb “Sən idin əmimi öldürən” deyərək atəş açdım. Daha sonra cibimdən qatlanan bıçağı çıxararaq bir neçə dəfə bıçaqladım”.
Daha sonra məhkəmədə zərərçəkmiş Seymur Alişanovun hüquqi varisi, qardaşı ifadə verib:
“Qardaşım 15-16 yaşından Şəmsiyyəni sevib. Anam qıza elçi gedib və onun “hə”sini almışdı. Şəmsiyyə subay vaxtı Seymurun sözlüsü olub. Ailələr arasında söz kəsildikdən sonra qardaşım hərbi xidmətə yollandı. Aslanın əmisi Cabir Nuriyev qardaşımla dost olmasına baxmayaraq, Şəmsiyyəni qaçıraraq onunla ailə qurdu. Seymur əsgərlikdən gələndən sonra heç kimə heç nə demədən Rusiyaya getdi.
Orada Cabiri bıçaqladığı üçün 14 il həbs cəzası aldı. Daha sonra Rusiya-Ukrayna müharibəsində könüllü iştirak etdiyi üçün həbsdən azad olundu. Anamı görmək üçün Masallıya gəldi. Cabirin qardaşı Qabil Seymura zəng edib “çaşıb Şəmsiyyəyə yaxın getsən, səni öldürərəm” deyib.
Hadisə günü qardaşım dostu ilə kafeyə çay içməyə gedib. Sonra da belə xəbərini aldıq.
Anlaqsız adam bir ay Seymuru necə güdə bilər? Anlaqsız adam çörək zavodunda necə işləyir? Aslan anlaqsız olmayıb, bilərək edib”.
Məhkəmədə Şəmsiyyə şahid qismində dindirilib. O, uşaqlıqdan Seymuru sevdiyini etiraf edib:
“15-16 yaşımdan Seymur Alişanovla istəkli olmuşuq. Seymurun anası bizə gələrək “həri”mi almışdı. Sonradan Seymur əsgər getdi. Həmin müddətdə onun yaxın dostu Cabir Nuriyev məni zorla qaçırdı. Cabirə onu istəmədiyimi, ondan ayrılacağımı və Seymura ərə gedəcəyimi dedim.
Cabir Nuriyevlə evlilikdən iki qız övladımız oldu. Artıq 15 ildir ki, boşanmışam və onunla heç rəsmi nikaha da girməmişdim. Yaşadığım evi də atam tikib. Seymurun həbsdən çıxıb gəldiyini eşitdim. O, məni qardaşımdan istəyəcəkdi və biz evlənəcəkdik. Hadisədən əvvəl Qabil Nuriyev zəng edərək dedi ki, “eşitmişəm, Seymur deyib ki, Şəmsiyyə ilə evlənəcəm”. Mən də cavabında “mənim həyatıma qarışa bilməzsən, mən onunla ailə quracam” dedim. Aslan anlaqlı olmasa, onu 10 gün güdməzdi. Hər şeyi bilərək edib”.
Məhkəmədə aparılan istintaq və tərəflərin çıxışları ilə Aslan Ağazadənin hadisəni anlaqsız törətdiyi bir daha sübuta yetirildiyi üçün cinayət məsuliyyətindən azad edilib.
Onun barəsində psixiatriya stasionarlarında intensiv müşahidə altında məcburi müalicə təyin edilib.
Fidan İlqar
View this post on Instagram
