Masallıda, digər ənənəvi sahələrdən geri qalmayaraq, arıçılıq təsərrüfatı da inkişaf edir. Bu haqda bu gün, 20 avqust tarixində Cenublu.az Masallı RİH-yə istinadən xəbər verir.
Hazırda arıçılıqda süzmə işləri aparılır. 250 arı ailəsi olan Ərkivan qəsəbə sakini Qönçə Quliyeva artıq balın bir qismini süzüb. O bildirir ki, ötən ilə nisbətən, artıq 20%-30% çox bal əldə edib. Qönçə xanım deyir ki, o, iki arı ailəsi ilə təsərrüfata başlayıb, hazırda isə 250 arı ailəsinə sahibdir.
“Üç gündür ki, bal süzürük. May balını da süzmüşdük. Amma indi bütün çiçəklərin nektarları toplanılıb. Hazırda müalicəvi çiçəklərdən toplanan balı süzürük. Pətəklərimizi də görürsüz, doludur. Bir yeşikdən 20 kiloqram bal alırıq. Ötən il isə 12-15 kiloqram götürürdük. Yaz aylarında yağıntı çox olduğundan çiçəklər yaxşı nektar verdi, nəticədə arılar da yaxşı işlədi və məhsuldarlıq bol oldu”, - deyə Qönçə xanım bildirib.
Arıçı Asim Quliyev də bu il məhsuldarlığın çox olduğunu bildirib. O deyir ki, onlar arıları bu il digər rayonlarla yanaşı, Lerikə də aparıblar. Lerik təbiətində çiçəklər zəngindir, müalicəvi xüsusiyyətləri çoxdur. Asim bəy hazırda Lerik balının süzməsini həyata keçirir. Onun sözlərinə görə, Lerik balı sırf müalicəvi çiçəklərdən toplandığına görə qiyməti də baha olacaq.
Hər arı pətəyinə görə subsidiyanın verilməsi məhsul istehsalçılarının bu sahəyə marağını daha da artırıb. Masallıda 539 arıçıya 11 min 521 arı ailəsi üzrə subsidiya ödənilib.
