Masallı rayonunda Aprel şəhidi Nurlan Bayram oğlu Əsgərlinin 8-ci ildönümü münasibətilə ədəbi-bədii kompozisiya nümayiş olunub. Bu haqda məlumatı Cenublu.az bu gün, 8 aprel tarixində verir.
Tədbir Seyran Hacıyev adına Viləş kənd tam orta məktəbində keçirilib. Buraya rayon rəsmiləri, məktəb kollektivi, şəhidin ailə üzvləri qatılıblar. Onlara şəhid Nurlan Əsgərlinin həyat hekayəsi, döyüşdəki şücaəti haqqında geniş məlumat verilib.
Görüş şagirdlərin ifasında mahnı, şeir və Aprel döyüşlərindən bəhs edən bədii kompozisiyaların təqdim edilməsi ilə davam edib.
Yekunda Viləş kənd qəbiristanlığında şəhid N.Əsgərli və digər şəhidlərin məzarları ziyarət olunub.
Tədbir Seyran Hacıyev adına Viləş kənd tam orta məktəbinin, Masallı Xalq Teatrının və Viləş kənd Yaradıcılıq Evinin birgə təşkilatçılığı ilə baş tutub.
Qeyd edək ki, N.Əsgərli “Hərbi xidmətdə fərqlənməyə görə” III dərəcəli medalı ilə təltif edilib.
