Masallı rayon Mərkəzi Kitabxanasında tarixçi-etnoqraf, pedaqoq, maarifçi Teymur Bayraməlibəyovun anadan olmasının 160 illiyi ilə əlaqədar “Ziyalılıq zirvəsinin fatehi” adlı tədbir keçirilib. Bu haqda məlumatı Cenublu.az bu gün, 24 avqust tarixində Masallı Regional Mədəniyyət İdarəsinə istinadən verir.
Tədbirdə çıxış edən muzeyin direktoru Əntiqə Tağıyeva bildirib ki, T. Bayraməlibəyov Azərbaycan pedaqoji fikir tarixində silinməz iz qoymuş parlaq simalardan biri olub. O, bütün həyatı və fəaliyyətini Azərbaycan mədəniyyətinin, elminin və təhsilinin inkişafına həsr etmiş, həmvətənlərimizin maariflənməsində mühüm xidmətlər göstərib.
Sonra Mərkəzi kitabxananın əməkdaşı Rasif Dadaşov çıxışında qeyd edib ki, T. Bayraməlibəyovun həyat və yaradıcılığı haqqında Nurəddin Ədiloğlunun qələmə aldığı nadir materiallarla zəngin əsəri əsasında Elsevər Əliyevin çəkdiyi sənədli film yaxın zamanda ictimaiyyətə təqdim olunacaq.
Sonda məruzə ilə çıxış edən muzey əməkdaşı Sevinc Əliyeva onun əsərləri haqqında ətraflı məlumat verib.
Qeyd edək ki, tədbir Masallı rayon Mərkəzi Kitabxanası və Tarix-Diyarşünaslıq muzeyinin birgə təşkilatçılığı ilə baş tutub.
