Masallıda Birinci Qarabağ və Vətən müharibələri qəhrəmanlarının tanıdılması məqsədilə “Vətənin ölməz oğulları” layihəsi çərçivəsində növbəti tədbir keçirilib. Bu haqda məlumatı Cenublu.az bu gün, 15 sentyabr tarixində Masallı RİH-yə istinadən verir.
Tədbirdə layihənin əhəmiyyətindən danışılıb və sentyabr ayında doğulan, Birinci Qarabağ və 44 günlük Vətən müharibələrində döyüşmüş əsgər və zabitlər haqqında məlumat verilib. Tədbirdə çıxış edən müharibə veteranı Cəmaləddin Məmmədov, DQİDK-nın Masallı Bölgəsi üzrə Şöbəsinin müdiri Elvin Hüseynli, “Ümidim sənsən” ictimai-sosial birliyinin nümayəndəsi Fidan Abbaslı Müzəffər Ali Baş Komandanın rəhbərliyi altında 44 günlük Vətən müharibəsində qazandığımız Zəfərin xalqımızın minlərlə qəhrəman övladının canı-qanı sayəsində əldə edildiyindən ətraflı danışıblar.
Yekunda sentyabr ayında doğulan şəhid ailələrinə layihə təşkilatçıları tərəfindən “Təşəkkürnamə”lər təqdim olunub.
Qeyd edək ki, tədbir Masallı Tarix-Diyarşünaslıq Muzeyi, Dövlət Rəsm Qalereyası, “Ümidim sənsən” sosial inkişafa yardım ictimai birliyinin birgə təşkilatçılığı ilə baş tutub.
