Masallı rayon Mərkəzi Kitabxanasında şəhid Niyaməddin Sultanzadənin ad gününə həsr olunmuş “Şəhidlik ən uca və müqəddəs zirvədir” mövzusunda tədbir keçirilib. Bu haqda məlumatı Cenublu.az bu gün, 12 sentyabr tarixində Masallı rayon İcra Hakimiyyətinə istinadən verir.
Tədbirdə çıxış edənlər Niyaməddin Sultanzadənin keçdiyi şərəfli döyüş yolu haqqında iştirakçılara geniş məlumat verilib, torpaq uğrunda şəhid olan mərd oğulların gələcək nəsillər üçün əsl vətənpərvərlik nümunəsi olduğu vurğulanıb.
Qeyd edək ki, Sultanzadə Niyaməddin Hüsaməddin oğlu 1998-ci il sentyabrın 10-da Masallı şəhərində anadan olub.
27 sentyabr 2020-ci ildə Azərbaycan Respublikasının ərazi bütövlüyü uğrunda başlayan Vətən müharibəsinə könüllü qoşulub. Cəbrayıl və Füzuli rayonlarının erməni işğalçılarından təmizlənməsində şücaət göstərib. Noyabrın 6-da Qubadlı rayonu istiqamətində gedən döyüşlərdə şəhidlik zirvəsinə ucalıb.
Ölümündən sonra “Vətən uğrunda”, “Cəbrayılın azad olunmasına görə” və “Qubadlının azad olunmasına görə” medalları ilə təltif olunub. Kinooperator Elsevər Əliyev Niyaməddin Sultanzadəyə həsr olunmuş “Zirvənin sakini” adlı sənədli film ərsəyə gətirib.
