Növbədənkənar prezident seçkilərində iştirak etmək üçün Masallı rayonundan olan namizəd müraciət edib. Bu haqda məlumatı Cenublu.az bu gün, 4 yanvar tarixində verir.
Qulamhüseyn Əlibəyli 1958-ci il sentyabrın 8-də Masallı rayonunun Köhnə Alvadı qəsəbəsində anadan olub. Bakı Dövlət Universitetində hüquq üzrə ali təhsil alıb. Əlibəyli 1992-ci ildən Azərbaycan Ali Soveti Aparatında əvvəlcə konstitusiya hüquq məsələləri bölməsinin, sonra isə dövlət quruculuğu şöbəsinin müdiri vəzifəsində çalışıb.
1992-ci ilin noyabr ayından 1993-cü ilin iyun ayınadək Azərbaycan Prezidentinin (Əbülfəz Elçibəy) parlamentlə əlaqələr üzrə müşaviri vəzifəsində çalışıb.
1995-ci və 2000-ci illərin Parlament seçkilərində Azərbaycan Xalq Cəbhəsi Partiyasının deputatı seçilib. 1990-cı ildən isə Azərbaycan Xalq Cəbhəsi Ali Məclisinin üzvü olub.
Qulamhüseyn Əlibəyli 2008-ci il noyabrın 14-də Aydınlar Partiyasını qurduğunu bildirib. 17 aprel 2023-cü il tarixində Aydınlar Partiyasının fəaliyyətinə xitam verilib.
