Masallı rayonu üzrə təhsil sektoruna müdir təyin olunub. Bu haqda məlumatı Cenublu.az bu gün, 9 avqust tarixində Lənkəran-Astara Regional Təhsil İdarəsinə istinadən verir.
Belə ki, sözügedən vəzifə Lənkəran-Astara Regional Təhsil İdarəsinin Masallı sektoru üzrə aparıcı məsləhətçisi olan Qoşqar Hətəmova həvalə olunub.
Qeyd edək ki, Qoşqar Hətəmov 2000-ci ildə Bakı Dövlət Universitetinin Coğrafiya fakültəsini, 2010-cu ildə isə Lənkəran Dövlət Universitetində Fiziki coğrafiya ixtisası üzrə magistr pilləsini bitirib. Uzun müddət müəllim kimi fəaliyyət göstərib. Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın təşkil etdiyi imtahanın müsabiqə və müsahibə mərhələsində uğur qazanaraq 2011-ci ildə Masallı Rayon Təhsil şöbəsinə böyük məsləhətçi vəzifəsinə təyin edilib. 2022-ci ildən aparıcı məsləhətçi vəzifəsində işləyib.
