Masallı rayon Mərkəzi Xəstəxanasının (RMX) Əməliyyatxana bölməsinin müdiri vəzifəsinə təyinat olub. Bu haqda məlumatı Cenublu.az bu gün, 18 iyul tarixində verir.
Belə ki, qeyd olunan vəzifəyə Alim İslam oğlu Məmmədov təyin olunub.
Alim Məmmədov 14 yanvar 1963-cü ildə Masallı rayonunun Böyük Xocavar kəndində anadan olub. 1981-1983-cü illərdə Belorusiya SSR-nin ərazisində Sovet Ordusu sıralarında hərbi xidmətdə olub. 1984-cü ildə N.Nərimanov adına Azərbaycan Dövlət Tibb Institutunun 2-ci müalicə-profilaktika fakültəsinə daxil olub, 1990-cı ildə həmin institutu fərqlənmə diplomu ilə bitirib. Oxuduğu illərdə təhsildə qazandığı yüksək nailiyyətlərə görə Lenin təqaüdünə layiq görülüb. 1990-1992-ci illərdə ATU-nun ümumi cərrahiyyə kafedrasının klinik ordinatoru, 1992-1995-ci illərdə həmin kafedranın aspirantı olub. 1996-cı ildə “Qanaxma ilə ağırlaşmış mədə və onikibarmaq bağırsaq xoralı xəstələrdə müalicə taktikasının seçilməsinin müasir aspektləri” mövzusunda namizədlik dissertasiyasını müdafiə edərək tibb elmləri namizədi alimlik dərəcəsini alıb.
Alim Məmmədov 1995-2015-ci illərdə ATU-nun ümumi cərrahlıq kafedrasının assistenti, 2015-2023-cü illərdə həmin kafedranın dosenti vəzifəsində çalışıb.
32 ildən artıq cərrahi, 25 ildən artıq pedaqoji təcrübəyə malikdir. 2 dərs vəsaitinin, 2 metodik tövsiyənin, 2 səmərələşdirici təklifin, 2 metodik dərs vəsaitinin və 100-ə yaxın elmi məqalə və tezisin müəllifidir.
