Dövlət Statistika Komitəsi Masallıda qadınlarla bağlı statistikanı açıqlayıb. Bu haqda məlumatı Cenublu.az bu gün, 9 mart tarixində verir.
Dövlət Statistika Komitəsinin Masallı Rayon Statistika İdarəsindən verilən məlumata əsasən, 2024-cü ilin əvvəlinə Masallı rayonunun əhalisinin ümumi sayının 49,6 faizini qadınlar təşkil ediblər. Ötən ildə doğulan 2559 körpədən 45,6 faizi qız uşaqları olublar.
Rayonun ümumi təhsil müəssisələrində müəllimlərin 66,4 faizi, orta ixtisas təhsil müəssisələrində 52,3 faizi qadınlardır. Ümumi təhsil müəssisələrində təhsilalanların 46,3 faizini, orta ixtisas təhsili müəssisələrində isə tələbələrinin 61,0 faizini qızlar təşkil edirlər.
Qadınlar rayonun sosial-iqtisadi həyatında fəal iştirak edirlər və onların məşğul əhalinin ümumi sayındakı xüsusi çəkisi ilkin məlumatlara əsasən, 36,2 faiz təşkil edir. Dövlət qulluğunda çalışanlar arasında qadınların xüsusi çəkisi 10,3 faizdir.
