“Qəhrəmanlarımızı Tanıdaq” layihəsi çərçivəsində “Masallı Gənclər Evi” sosial xidmət müəssisəsinin kollektivi ll Qarabağ Müharibəsi qazisi Çingiz Rəşid oğlu Bəşirovu ziyarət edib. Bu haqda məlumatı Cenublu.az bu gün, 26 avqust tarixində Masallı RİH-ə istinadən verir.
Ziyarət zamanı qazimizin keçdiyi şərəfli döyüş yolundan söhbət açılıb, qayğıları dinlənilib. Qəhrəmanımız müharibədə qələbə qazanmağının sevincini, döyüş xatirələrini bizimlə bölüşüb. Vətən müharibəsi başlandığı gündən etibarən şəxsi heyət arasında qələbəyə inamın yüksək olduğunu bildirib.
Qeyd edək ki, Bəşirov Çingiz Rəşid oğlu 19 aprel 1997-ci il tarixində Masallı rayonunun Xanalion kəndində anadan olub. 2003-2012-ci illərdə Masallı rayon N.Bağışov adına Xanalion kənd ümumi orta məktəbində təhsil alıb. 2016-2018-ci illərdə çağırışçı kimi hərbi xidmətə yollanıb, həqiqi hərbi xidmətini Azərbaycan Silahlı Qüvvələrinin “N” saylı hərbi hissəsində davam etdirib.
Bəşirov Çingiz 27 sentyabr 2020-ci il tarixində ll Qarabağ Müharibəsində Qubadlı, Cəbrayıl, Laçın, Xocavənd, Zəngilan və Füzuli rayonlarının azadlığı uğrunda gedən döyüşlərdə fəal iştirak edib. Qazimiz Qubadlı rayonunun azadlığı uğrunda gedən döyüşdə sağ çiynindən ağır yaralanıb.
Azərbaycan Respublikasının Prezidentinin sərəncamına əsasən, Bəşirov Çingiz Rəşid oğlu “Cəbrayılın azad olunmasına görə”, “Qubadlının azad olunmasına görə ”, “Vətən Müharibəsi İştirakçısı” və “Vətən Naminə” medalları ilə təltif olunub.
